Feb 2, 2011

mrowkooB

Binalik ko na ang hiniram kong libro na ‘Peksman (mamatay ka man), Nagsisinungaling ako (at iba pang kwentong kasinungalingan na hindi pa dapat paniwalaan)’ ni Eros S. Atalia. Sa facebook fan page ng Visprint Inc. ko nakilala ang nasabing libro, dahil sa wala naman akong pambili e humanap na muna ako ng ibang paraan para mabasa ‘yon. Gusto ko kasi na may preview na ako ng libro bago ko bilhin. Mahirap yung sa bookstore pa ako hihirit ng preview ng isang libro tapos e hindi ko naman bibilhin kapag hindi ko nagustuhan.

Halos dalawang linggo din nakitira sa’kin ang nasabing libro at hindi lang ata walong beses ko nabasa ang libro. Tama nga ang mga nagbigay ng blurb sa librong iyon. Magaling magbalasa ng mga salita si Eros. Ang simpleng kwento ay magiging nobela. Parang hindi sya marunong magtapon ng mga salita. Kaya nyang gawing kasinghaba ng isang taon na kwento ang pinagdaanan ng isang tao sa isang araw lamang. Iyon ang natutunan ko sa kanya, ang bumalasa at magpaliko-liko ng salita. Natutunan ko din na wag ipokus ang istorya sa mismong topic mo, kailangan lumiko-liko ka sa mga madadaanan mo bago mo tumbukin ang dulo.

Sa ngayon ay may hinihiram na naman akong libro, sikat na ang libro at usap-usapan na sa fan page ng libro at sa fan page ng sumulat ng libro ang istorya nito. Hindi ko pa nababasa ang libro pero kung pagtya-tyagaan ko lang basahin ang napakadaming wall posts ng mga nakabasa na ng nasabing libro, mukhang mabubuo ko ang kwento ng libro. Mukhang pwede nga din i-print at gawin ulit panibagong libro ang mga comment at wall posts nila dahil sa haba ng mga sinabi nila. Na sa kahit anong anggulo tingnan ay isa lang naman ang gusto nilang sabihin – na nabasa na nila ang libro.

Nakakalungkot isipin na madaming Pinoy (kung hindi lahat) ang naka-ugalian nang ikwento ang mga nabasa nila. Sa totoo lang ay hindi lang ang nabasa nila. Kahit ang napanuod, napakinggan at nagawa o napuntahan nila ay kinukwento nila. Hindi kaya nila naisip na hindi naman lahat ng taong pinagku-kwentuhan nila ay natutuwa na kinekwento nila ang nabasa nila? May mga tao din naman na gustong basahin ang hindi pa nababasa. Nakakalungkot isipin na madalas ay nagiging kagaya din nila ako. Makwento.

Sa ngayon, habang hinihintay ko ang ipapahiram sa aking libro, ay palit-palitan ko na munang binabasa at tinitingnan ang dalawang libro dito sa bahay. Literary folio ang mga ito ng student publication sa isang university dito sa lugar namin. Mga tula, prosa, kwento at mga photograpy na gawa ng mga estudyante ng unibersidad ang nakalagay sa libro. Binbasa dahil may mga kwento, tula, at prosa nang tumatak sa isip ko at maku-kwento ko kung sakaling may magtanong. Tinitingnan dahil may mga kwento at tula na medyo wala sa panlasa ko, yun e ang mga english. Dahil sa marami silang nagsulat sa libro, masasabi kong hindi naman isang buong libro ang nababasa ko kundi mga column lang. Nakakatuwang isipin na madaming estudyante din pala dito sa amin ang mahilig at may talento sa pagsusulat, madami sa kanila at yung sakto sa panlasa ko ang istilo nila. Yun ay ang pagsusulat na gamit ang wika natin.

Nakakaintindi at marunong naman ako magsalita ng wikang english. Pero ang sarap ng pakiramdam ko kapag natatapos ko basahin ang isang buong libro na naintindihan ko ang bawat salita. Sa english kasi, may mga salita sila na kung ihahambing sa wika natin ay malalalim na. Yung mga tipo ng salita na hindi na nagagamit para gamiting dialogue sa pelikula. Sakit ko pa naman na kapag may nabasa akong salita na hindi ko maintindihan at binabalikan ko ang chapter na pinanggalingan nya para malaman kung paano ginamit ang salita. Madalas hindi ko talaga nakukuha kaya hindi ko natatapos basahin ang libro. Tsaka hindi ko naman kailangan magsulat sa wikang english dahil hindi ko naman pinangarap ng mabasa ng mga banyaga ang mga sinusulat ko. Kaya sa wikang tagalog ako. Unique pa. Magmura man ako, hindi maiintindihan ng mga banyaga.

Madami pang libro ang gusto ko basahin, sa parehong paraan na naghahanap pa ako ng mga libro na pwedeng basahin. Tagalog ang gusto ko syempre. Kaya kung may ma-suggest kayo, i-comment nyo lang. Kahit indie book pa yan.




nagustuhan mo? i-share mo na!



No comments:

Post a Comment